Kum 1918 a Aizawl atanga Sipai chhungkua 9 hnawhchhuah zingah khan Pu Chiangdailova te chhungkua Mission Veng atanga hnawhchhuah an ni ve a. midangte rualin Sawleng an pan ve a. Sawleng atang hian kum 1923 bawr vel khan lo chhuk lehin Chaltlang (tuna Lily veng area) ah hian an awm a. Pu Chiangdailova nupui hi Pi Ngochhuni a ni a, fanu pahnih Ziki leh Dari an nei a. Hetih lai hian pasal an nei ve ve tawh. Anni nupa chauh hi Chaltlang khua ah Salvation an ni. Vengchhunga upa la damchhun te'n form sen haa an hmuh thin thu an sawi a, hak pui tur an nei ngai lo a ni.

Amaherawhchu kum 1931 a lo her chhuah chuan chhungkua 3 in Sipai Pawl zawm an lo duh ve ta a, Lieut.Sapliana kaihhruaina hnuaiah Pu Rama te chhung, Pu Thangreia te chhung leh Pu Ngursailova te chhungin Sipai Pawl ah hming an pe ve ta a ni. Hetih lai hian in ah an inkhawm mai thin a. Kum 1932 ah Lal an dil angin Biakin hmun pek an ni a, tuna Chaltlang HSS panna pengthuam lai tak hi a ni. Biakin an sa a, Nl Darringaii (Zaithiam) te unau in an zawm veleh a. Hlim tham takin an awm ve a. Nimahsela eizawnna thil ah an puipa deuhte an pem a ngaih avangin, an han sawprawp deuh a. Kum 1948 ah chuan an luahlum zo ta lova. Hetihlai hian Biakin Dar, a bial, a lai kua an nei thin a. An sawprawp chhung hian Sairang lamah hmeithai pitar in a lo kawl that sak a ni.

Kum 1950 tawp lamah Pu Thangreia leh Pu Ngursailova te chhungkua an rawn pem lut leh a, Sialhawk lam atangin Sipai Pawl mi leh sa nghet sa Pu Saia te chhungkua in an rawn fin bawk a, Biakin dar pawh la let lehin hma an la thar leh ta a. Lal hnenah Biakin hmun an dil leh a, tuna Chaltlang Community Hall lai tak hi a lo pe a, biakin sak an tan leh ta a. Amaherawhchu hmun hulum lai taka awm a ni a, thli a na viau bawk si a. Siamthat a ngai fo mai a, Pu Ngursailova in lamah an insuan leh ta a.

Hetih lai hian Aizawl Bazar Corps enkawlna hnuaia awm an ni a, Commanding Officer Major Tesina a ni. Tichuan June ni 5, 1958 ah Chaltlang khua chu Society a puan a lo ni ve ta a. Kum 1958 tawp lamah hian Bazar Corps CO thar Captain Thansiama kaihhruaina hnuaiah an awm tan a. Mi paruk lai Local Officer Commissioned an ni ve ta a. Aizawl pa hausa Pu Singngula'n a rawn zawm veleh a, a ni hian Ruamvenga Pu Papuia inhmun ( tuna Biakin leh C.O. quarter awmna hi) Rs.50 a lei in Sipai Pawl Biakin hmun atan a hlan a. Chaltlang a Sipai Pawl ngelnghet taka a dinna bul a lo ni ta a ni. Kum 1961 ah D.O. Senior Captain J.Kennedy a ho in Biakin an sa tan a, March 7 th 1962 khan Commissioner Joseph Dahya, Territorial Commander in Society Biakin thar Assam type, te fel ren rawn, a hun laia ‘pucca' ve tawk tak a hawng a ni. Hetih laia bialtu C.O. chu Captain Kapliana a ni.

Kum 1967 November atangin Major Thazova Chaltlang Society enkawl tura ruat a ni ta a. Brigidier Ngurliana'n March ni 11, 1968 ah Chaltlang Society chu Corps ah a lo puang ta a ni. Hetih lai hian Roll bu ah hming 74 a chuang a, tangka Rs.5.40 kawl a ni.

• June ni 5, 1958 ah Society a puan a ni.
• March ni 11, 1968 ah Corps a puan a ni.

Pu Chiangdailova te nupa atanga intanin midang an lo pakai a ni a. Enkawl thu ah chuan Aizawl Bazar Corps enkawlna hnuaiah a bet thin a ni. Corps atanga indang ni hran lovin, Chaltlang khuaah hian Pu Chiangdailova te nupa hian an lo din tan ve ni maiin a lang.