16 August Thawhtanni: Champhai-a Kendriya Vidhyalaya, Central School chu School Education Minister Lalsawta chuan Channel Building Ground Floor-ah a hawng. He school hi hemi ni hian tan nghal tura tih a ni. Minister hian hemi ni vek hian Champhai-a Head of Department tinte kokhawmin Sawrkar hmalakna leh hmachhawpte an inhrilhfiah bakah, infuihna hun atan a hmang nghal bawk.

17 August Thawhlehni: Hmarchhak biala Reserve Bank of India Regional hotute chuan thuthar thehdarhtute an kawm. Reserve Bank of India Director Surekha Marandi chuan tunlaia sms, email leh thil dang hmanga lottery man anga sawite, pawisa thawn hmasak ngai anga hna leh zirna buaipui sak thei anga insawite leh mi account hmanga pawisa lakchhuah chingte chuan Mizoram pawh a rawn luhchilh ve ta tih a sawi a, heng mite lakah hian mipuite fimkhur turin an chah thu an sawi.

18 August Nilaini: Aizawl atanga Thenzawl paltlanga Lunglei panna kawng sialthar chungchangah All Vehicle Organisation Joint Action Committee (AVOJAC), Lunglei chuan Lungleia chanchinbu leh chanchinthar puanzarna disc phur luh leh phurchhuah chu August ni 16 atang khan khapin vawiin thlengin he hmalakna hi kalpui a la ni. He thil an tih chhan hi Lunglei MJA hruaitute leh AVOJAC hruaitute inkara inhmuhthiam loh avanga hmalakna ni a hriat a ni.

19 August Ningani: Zo Anthurium Growers Society chuan Aizawl Press Club-ah chanchinthar lakhawmtute an kawm. Zo Anthurium Growers Society President Laldinpuii chuan Mizoram atanga Anthurium thawnchhuaktu pawl dang an duh reng ti a sawi. Mizoram atanga thawnchhuaktu Zopar Export Private Limited-te chuan tunhnaiah a thawnna bawm siamsa an neih loh avangin engemaw hun chhung chu an thawn mumal theih tawh loh avangin an buai hle tih sawiin thawnchhuahsaktu tur an mamawh thu a sawi bawk.

20 August Zirtawpni: Transport Secretary P. Lalthlengliana chuan thuthar thehdarhtute kawmin Mizoram-a motor pung zel leh khawpui tawt zel tih ziaawmna atana an hmalak tum dan a tarlang. Mizoram Motor Vehicle Rules 1995 hman tura pawm a nih hnuah August 30, 2010 atang chuan garage nei hmasa lo chuan motor thar registered theih a ni tawh dawn lo tih Transport Secretary chuan a sawi.