- Lt. Col. Lalthlamuana

Dated Chaltlang, 25thJuly 2010 : Vawiin hi Retired & Pension Officer Sunday a ni a, he hun hi kum dangah hman ala ni ngai lovin tun tum hi a vawi khatna tur a ni a, hemi pual hian Lt. Col. Lalthlamuana chuan Retired Officer Fellowship chungchang a rawn ziah avangin a chungah kan lawm hle a ni.

Vawiin hi Retired Officer Sunday a nih avangin chulam hawi thei thilte a ni a, hei hi ka han ziak a ni. Salvation Army Officer ni a kum 25 chhung Pathian leh Sipai Pawl tana rawng lo bawl tawh, kum 60 tlingte chu chawlhtir an ni a, an rank pangngai neiin, bracket-ah Retired tia chhinchhiah an ni thin. ‘Kum 63-ah retire tur’ tih dan thar a awm. Pasal/nupui chu kum 63 a tlinin a chawl ang a, a nupui/pasal chu kum 63 a la tlin ve hma chu chawl ve lovin a thawk zui rih ang. Hei hian mipa leh hmeichhia intlukna a tichiang a ni. Tun hmaa hrisel lohna avanga pension ang kha a theih tawh loh a ni.

                An hming tawpa retired (R) tih tel thin kha General John Gowans hun atangin tih tawp a ni. General chuan, “Tun atangin thawklai nihna atanga an chawlhin retired (R) hi official chuan hman a ni tawh lovang. Anmahniin hman an la duh chuan hnialna a awm lo; mahse official chuan hman a ni tawh dawn lo a ni, General chawl ta-ahte chauh lo chuan….” a ti. Hei hi a chhan pakhat chu rawngbawl tura nemngheh an ni a, a tulna apianga tirh theih an la ni reng a, retired tih avanga pawimawh ta lo leh ngaihnep an nih loh nan a ni. A ni tak a, Retired Officer tam takte chu tangkai taka rawih lehte pawh an awm a ni.

                Kan Territory-ah hian 1984 atangin Retired Officer Fellowship hi din tan a ni. Hruaitu hmasaberte chu Brig. Sapliana – Chairman, Brig. Ngurliana – Secretary, Major Buaia – Treasurer an ni. Hruaitu hi kum 2 hnuah an inruat thar zel thin. Tunah hian member 66 (nupa tuak 22 leh single 22) an ni.

                Fellowship hian thlatin ni 5-ah Aizawl Temple Corps YP Hall-ah Inkhawmna hun hman thin a ni a, International Secretary te, Territorial Commander te, Chief Secretary leh Officer khual-ten hun an hmang a nih loh chuan anmahni hun-neitu an inruat thin. Member tinin thlatin Rs.25/- an thawh a, thingpui innate, damlo kanna leh thil tul dang atan an hmang thin. Damlo, Hospital-a lut chu Rs.500/- in tanpui thin a ni a, phaia refer-te chu Rs.2000/- in tanpui an ni bawk thin. Ropuinaa kaisang Retired Officer Fellowship hminga inralna an neih thin erawh chu THQ-in, ‘Active leh Retired ten a huhova inral ni tawh se,’ a tih avangin tunah chuan a hranpaa inralna neih a ni ngai tawh lova ni. Tam dil te, Rih dil eh Sawleng-a Pu Kawlkhuma-te ho inkulhna an tlawh tawh a ni.

                Kum upa lam an ni a, thenkhatte chu bawrhsawmna eng eng emawin an tlakbuak thin a ni. Chutiangin an lawina Corps-ah chuan inkhawm te, thilpek leh an theihna kawngah chuan thahnemngai takin rawng an bawl thin a ni. Chhiatni thatni, abikin mithi vuinaahte hian Army timawitu tak an ni a, Active Officer-te aimahin an lang tam zawk thin. Retire thlenga thawh hi thil awlsam a ni lova, mi vannei an ni. Anmahni avanga tun dinhmuna ding thei kan nihna chen a awm a, “An thing, an mawl, an thusawite a tunlai lo,” ti a hmusit mai lovin I tawngtaisak zawk thin ang u.

                Kan retire Officer-te reng reng hi kan sawi tak ang khian mi inpe leh tlawmngai tak takte an nih bakah Sipai Pawl Mizoram-a en hniam a nih lai zawng zawng pawh hre pha chinte an nih avangin Sipai Pawl hmangaihna pawh an nei nasa em em a, heng avangte hian anmahni lawina Corps-ahte pawh thahnem an ngaiin hman dan thiam phei chuan an tangkai thei hle a ni. Lalpa’n Retired Officer-te malsawm zel rawh se.