Kohhran Pahnih - Amenmen

Dated Aizawl 04th December, 2011 : Ka lawn chhuah chak em em mai Tlang mawi tak chu hah tak chung chuan a chhip ka chuan ta vung mai! Hah tak chung leh thawh hlawp hlawp chung chuan kan hawi kual vel a, phul leh pangpar mawi tak ka hmuhte chuan hah an ti dam tak em! Tlang letliam kan thlir chuan ka rin loh tak mai ka zu hmu a, chu chu Kohran pahnih; hmelhmang inang tak chu a ni.

Kohhran pakhatna zawk an chet dan leh khawsak dan chu kan en ngun deuh chuan ka rin lo tak maiin chu mi Kohhran chu an lo ropui hle mai. Chumi Kohhran chhungah chuan mi challang tak tak leh hausa pui pui an lo ther fur mai chu niin. Chu Kohhran chu ropui tak an ni! Pa zahawm pui pui leh sum nei tak tak hlir an lo ni a, Pathian hnena an thil lawkkhawm te lah chu tam tham tak; chhiar tham fe a ni!

Chutiang fakauva Kohran ropuia lawi chu a va nuam dawn em, tiin kan belchiang leh deuh a. Mahse, han belchiang nak chuan pawn lama a landan nen chuan inperhsan tak a ni. A chhungah chuan hlemhletna, inhuatna, itsikna leh mahni hmasialna hlirin a lo khat a! Pathian tana rawngbawlna rilru putna reng reng an nei lo emaw tih theih tur a ni. Belchiang zui ngam ta lo chuan kan ral thlir leh a, ral atang chuan ropui tak chuan a lang leh ta tho mai. Mak ti takin Kohhran pahnihna lam chu kan hawi leh ta zawk a.

Kohhran pahnihna chu a pakhatna ang bawka ropui tura ka ngai chu ka tisual hle mai. Chu Kohhranah chu mi hnuaihnung tak tak, nitin mahni ei tur thawkchhuak tawng tawng an lo ni fur mai. Mak ka ti lutuk chu, ‘I han belchiang teh ang’ tiin ka luhchilh ve leh ta.
 Chu Kohhran chu pawn lam atanga thlir mai kha chuan lawi tlakna pawh ni awm lo tak hmel kha a pu a ni si a. Mahse; kan luhchilh nak chuan a hmaa ka ngaihdan chu a dik lo chiang hle mai tih ka hmuchhuak ta!

Kohhran pahnihna chhungah chuan thlamuanna ka la hmuh ngai reng reng loh chuan mi rawn uap tlat hian kan hre leh nghal a nih chu! Kohran mipuite inthurual taka rawngbawlnaa an kal leh ke an pen han hmuh meuh chuan chu Kohhran chu belh chakawm tak ni. Chuti-chuan, chu kohhran chu chhuahsanin tlang chhip lam chu ka pan leh ta hnak hnak a.

Chu tlang chhip atang chuan Kohhran pahnihte chu ka zuk thlir thin a, pakhat, pawn lam atang ropui em em, mah se han belhchiana a landan pha lo em em mai leh engmah a ni si lo. Pakhat zawk pawn lam atanga han thlir maia lawi tlakna hmel pawh  pu lo, mah se belhchian dawl em em thung. Thlamuanna leh hlimna ril tak mi chantir thei bawk si Kohhran pahnihte khaikhin chuan ka buai ta em em mai a.

‘Khawi Kohhranah zawkah khuan nge i lawi duh?’ tiin ka han inzawt ta chawt mai le! Ral khata ropui taka lang, mah se chhung lamah engmah ni si lo nge pawn lam atanga ena midang ropuina ang phak chiah lo; chhungrila belhchhian dawl leh tlo tak si chu ka belh zawk ang tiin; thlan tur zawk hre lo chuan tlang chhipah chuan ka thu kun ta reng a.